اتىراۋدا تۇڭعىش رەت «التاي – اتىراۋ اراسى» اتتا ءداستۇرلى تۇركى مۋزىكاسىنىڭ حالىقارالىق فەستيۆالى ءوتتى دەپ جازادى Qamshy.kz اقپارات اگەنتتىگى.

قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆ تامىرى تەرەڭ تۇركى جۇرتىنىڭ تاريحى مەن رۋحاني بىرلىگىن ناسيحاتتاۋ ماقساتىندا 2019 جىلى تۇركى حالىقتارىنىڭ مادەني كۇندەرىن ۇيىمداستىرۋ كەرەكتىگىن باسا ايتقان ەدى.

اتىراۋ وبلىسىنىڭ اكىمى نۇرلان نوعايەۆ اتالعان شارا اياسىندا ۇيىمداستىرۋشىلارمەن جانە ازەربايجاننان، رەسەيدەن، قىرعىزستاننان، وزبەكستاننان، تۇركىمەنستاننان جانە ەلىمىزدىڭ ءار وڭىرىنەن كەلگەن كومپوزيتورلارمەن كەزدەستى. كەزدەسۋدە مادەنيەت پەن ونەردى بىرلەسە دامىتۋ بويىنشا (تۇركسوي) حالىقارالىق ۇيىمىنىڭ باس حاتشىسى مۇنداي شارانىڭ قازاقستاندا العاش رەت ءوتىپ جاتقانىن اتاپ ءوتتى.

وبلىس اكىمى حالىقارالىق فەستيۆالدى ۇيىمداستىرۋدىڭ ماڭىزىنا توقتالدى.

− سىزدەر – ءوز ءىسىن ۇزدىك مەڭگەرگەن شەبەرسىزدەر. اللا بەرگەن تالانتتىڭ، ەڭبەكتەرىڭىزدىڭ ارقاسىندا تابىس بيىگىنەن كورىندىڭىزدەر. سىزدەردى ءوز ەلدەرىڭىز عانا ەمەس، جىراق جەرلەر دە تانىپ وتىر. ءبىزدىڭ دە مادەنيەت، ادەبيەت، ونەر قايراتكەرلەرى مارتەبەلى رەسپۋبليكالىق، حالىقارالىق بايقاۋلاردا توپ جارىپ، لاۋرەات اتانىپ جۇرگەنىن ماقتانىشپەن اتاپ وتەمىن. بۇل – ءبىزدىڭ كوريفەيلەرىمىز قالىپتاستىرعان بازانىڭ، ءداستۇردىڭ جەمىسى. بۇل – قۇرمانعازى، دينانىڭ ەلى، – دەدى نۇرلان نوعايەۆ.

فەستيۆال تۇركى الەمىنىڭ م ۋ ز ى ك ا ل ى ق م ۇ ر ا س ى ن باعالاۋشىلاردى قۋانتىپ، اتىراۋدىڭ تۇرعىندارى مەن قوناقتارىنىڭ ەسىندە قالاتىن وقيعا بولعانى داۋسىز. شاراعا الىس-جاقىن شەتەلدەردەن تۇركىتىلدەس حالىقتاردىڭ ونەرىنىڭ تۋىن جەلبىرەتىپ جۇرگەن كومپوزيتورلار قاتىستى.

اتاپ ايتقاندا، رەسەي فەدەراسياسىنىڭ حالىق ءارتىسى، رف كومپوزيتورلار وداعىنىڭ ءتوراعاسى راشيد قاليمۋللين، باشقۇرتستان حالىق ءارتىسى، باشقۇرتستان كومپوزيتورلار وداعىنىڭ ءتوراعاسى لەيلا يسماگيلوۆا، قىرعىزستان حالىق ءارتىسى، قىرعىزستان كومپوزيتورلار وداعىنىڭ ءتوراعاسى، قىرعىزستان مەملەكەتتىك كونسەرۆاتورياسىنىڭ رەكتورى مۇراتبەك بەگالييەۆ، ازەربايجان حالىق ءارتىسى، گادجيبەكوۆ اتىنداعى ازەربايجان مەملەكەتتىك مۋزەيىنىڭ ديرەكتورى ساردار فارادجيەۆ، وزبەكستاننىڭ ەڭبەك سىڭىرگەن ونەر قايراتكەرى، وزبەكستان مەملەكەتتىك كونسەرۆاتورياسىنىڭ دوسەنتى حۋرشيداحون حاسانوۆا، تۇركىمەنستاننىڭ ەڭبەك سىڭىرگەن ونەر قايراتكەرى، تۇركىمەنستان كومپوزيتورلار وداعىنىڭ ءتوراعاسى روۆشەن نەپەسوۆتار كوك تەڭىزدىڭ ساعاسىنا، اق جايىقتىڭ جاعاسىنا كەلىپ، ءوز تۋىندىلارى ارقىلى ءتۇبى ءبىر تۇركى حالىقتارىنىڭ تۋىستىعىن دالەلدەدى.

فەستيۆال جوباسىنىڭ اۆتورى – قازاقستان رەسپۋبليكاسى مەملەكەتتىك سىيلىعىنىڭ لاۋرەاتى، تۇركى كومپوزيتورلار قاۋىمداستىعىنىڭ پرەزيدەنتى بالنۇر قىدىربەك.

فەستيۆال شىمىلدىعى رەسپۋبليكالىق كونكۋرستاردىڭ لاۋرەاتى سايا جۇماشيەۆانىڭ ديريجەرلىك ەتۋىمەن «نارىن» حالىق اسپاپتار وركەسترىنىڭ ورىنداۋىنداعى بالنۇر قىدىربەكتىڭ «التاي–اتىراۋ اراسى» تۋىندىسىمەن اشىلدى.